Default Interface Methods

Default metod java 8 ilə yeni gələn özəlliklərdən biridir. Default metod interface`in daxilində default açar sözü ilə tanımlanan və gövdəsi olan metoddur. Interface`i implements edən classların default metodu override etmək kimi bir məcburiyyəti yoxdur. Classların sərbəst seçimi var, istəsə override edə bilər, istəməsə yox. Əgər override etməsə, o zaman interface`də tanımlanan default metod istifadə ediləcəkdir. Sintaksisi aşağıdakı kimidir:

public interface DefaultMethod {
    
    public int getCount();

    public default int getNumber(){
        return 7;
    }

    public default void showNumber();  // DOES NOT COMPILE 

    public String getName(){           // DOES NOT COMPILE  
        return "Ülvi";
    }	  
}

Default metodlar üçün aşağıdakı qaydalar mövcuddur:

Default metod ancaq interface daxilində elan edilə bilər, class və abstract class daxilində elan edilə bilməz;
Default metodlar default açar sözü ilə işarələnməlidir və əgər default açar sözü ilə işarələnibsə, mütləq gövdəsi olmalıdır;
Default metodların static, final və ya abstract olduğu fərz edilməməlidir (daha dəqiq desək default metodlarla bu açar sözlərin birgə istifadəsinə icazə verilmir), onlar interface`i implements edən class tərəfindən istifadə edilə və ya override oluna bilər;
Bütün interface metodları kimi default metodların da public olduğu fərz edilməlidir. Və bu səbəbdən private və ya protected kimi işarələnən default metodlar compile olunmur.

Əgər hər hansı bir interface, daxilində default metod olan başqa bir interface`i extends edərsə, həmin default metod ilə bir neçə cür davrana bilər:

default metodla bağlı hər hansı bir davranışdan imtina edə bilər, bu zaman original default metod üçün tanımlanmış gövdə istifadə olunur;
default metodu yenidən override edə bilər;
default metodu yenidən abstract metod kimi tanımlaya bilər. Belə olduqda isə artıq ikinci interface`i implements edən class həmin metodu override etmək məcburiyyətindədir.

Nümunə:

public interface HasFins {
    
    default int getInt() {
        return 1;
    }
    
    public default double getDouble() {
        return 2;
    }
    
    default public boolean getBoolean() {
        return true;
    }
}

interface SharkFamily extends HasFins {
    
    int getInt();
    
    default double getDouble() {
        return 5;
    }
}

class TestHasFins implements HasFins { }

class TestSharkFamily implements SharkFamily {
    
    TestSharkFamily() {
        System.out.println(getDouble());   // 5.0
    }
    
    public int getInt() {
        return 7;
    }
    
    public static void main(String args[]) {
        new TestSharkFamily();
    }
}

Interface’in default metodlarını həmin interface’i implements edən konkret class daxilində super açar sözü ilə çağırmaq mümkün deyil. super açar sözü ancaq classlar üçün istifadə edildikdə düzgün işləyir. Əgər default metodlar üçün istifadə etmək istəyiriksə, mütləq super açar sözünün qarşısında həmin interface’in adını qeyd etmək lazımdır:

interface Walk {
    public default int getSpeed() {
        return 10;
    }
}

abstract class Animal {
    public String getColor(){
        return "black";
    }
}

class Cat extends Animal implements Walk {

    public Cat() {
        System.out.println(this.getColor());
        System.out.println(super.getColor());
        
        System.out.println(this.getSpeed());
        System.out.println(super.getSpeed());   // DOES NOT COMPILE
        System.out.println(Walk.super.getSpeed());
    }
}

MyExamCloud’da suallardan birində maraqlı bir faktla qarşılaşmışdım. Deməli, faktda qeyd olunurdu ki, siz interface’də default metodları java.lang.Object classına aid (final olmayan) hər hansı bir metodu override etmək üçün istifadə edə bilməzsiniz, əks halda compile xətası alacaqsınız:

interface A {

    int groupID = 10;

    default boolean equals(Object obj) {    // DOES NOT COMPILE
        return this.groupID == ((A) obj).groupID;
    }

    static void print() {
        System.out.println("A");
    }
}

Default Methods and Multiple Inheritance

Əvvəlki mövzulardan birində qeyd etdik ki, hər hansı bir class tərəfindən implements olunan interface`lərdə eyni abstract metodlar olarsa, problemsiz compile olunur, çünki dublikat metodlar sayılır. Amma default metodlarla vəziyyət nisbətən fərqlidir. Compiler eyni default metodlar aşkarladıqda xəta verir:

interface Walk {
    public default int getSpeed() { return 10; }
}

interface Run {
    public default int getSpeed() { return 20; }
}

public class Cat implements Walk, Run {     // DOES NOT COMPILE
    public static void main(String[] args){
       System.out.println(new Cat().getSpeed());
    }
}

Bu nümunədə Cat classı iki eyni default metodu (getSpeed()) irs alır, amma təyin edə bilmir ki, hansı metodu istifadə etməlidir, 10 çap olunmalıdı ya 20 ?! Ona görə də compiler belə konfliktlə rastlaşdıqda xəta verir. Amma burada bir istisna var: əgər subclass konflikt yaradan default metodu (getSpeed()) override etsə, o zaman bu kod heç bir problem olmadan compile olunacaqdır:

public class Cat implements Walk, Run {   
    public int getSpeed(){ return 30; }
    public static void main(String[] args){
       System.out.println(new Cat().getSpeed());   // 30
    }
}

[topics lang=az]