Passing Data Among Methods

Java “pass by value” dildir. Yəni bu o deməkdir ki, dəyişənin kopyası yaradılır və metoda parametr kimi həmin kopya göndərilir. Metod daxilində göndərilmiş həmin parametrin dəyərinin dəyişdirilməsi (assignment) orijinal dəyərə (caller) təsir göstərmir.

public static void main(String[] args) {
  int age = 29;
  String name = "Mushfiq";
  changeValues(age, name);
  System.out.println(name + " " + age);    // Mushfiq 29
}
public static void changeValues(int age, String name) {
  age = 23;
  name = "Murad";
}

Dəyişən adı ilə metoda göndərilən parametr adı eyni olmaya bilər, sadəcə çaşdırmaq üçün imtahanda adətən eyni adlardan istifadə olunur. Əgər java “pass-by-reference” dil olsaydı, o zaman nəticə  Murad 23 olardı.

Mutable obyekt dəyişənlərini metoda parametr olaraq göndərərkən diqqətli olmaq lazımdır. String immutable dəyişəndir, ona görə də göndərilmiş metodda ona yeni dəyər mənimsədilməsi onun orijinal dəyərini dəyişmir. StringBuilder ilə isə vəziyyət bir az fərqlidir, nümunəyə baxaq:

public static void main(String[] args) {
  StringBuilder name = new StringBuilder("Mushfiq");
  changeName(name);
  System.out.println(name);    // Murad
}
public static void changeName(StringBuilder sb) {
  sb.delete(0, sb.length()).append("Murad");
}

Burada name referans dəyişəndir və sb də name dəyişəninin kopyasıdır və beləcə hər iki referans eyni StringBuilder obyektinə işarə edir. Buna görə də sb referansından istifadə edərək müvafiq metodları çağırmaqla həmin StringBuilder obyektinin dəyərini dəyişmək mümkündür. Burada yenidən dəyər mənimsətmədən (reassign) söz gedə bilməz. Yenidən dəyər mənimsətmə olarsa, o zaman orijinal dəyər yenə dəyişilməz olaraq qalır:

public static void main(String[] args) {      
  int[] arr = {1, 3, 5, 7};
  changeArray(arr);
  System.out.println(Arrays.toString(arr));    // [0, 4, 5, 7]
}
public static void changeArray(int[] arr) {
   arr[0] = 0;
   arr[1]++;
   arr = new int[4];  // line1
   arr[2] = 9;
}

Koddan göründüyü kimi line1 sətrində arr dəyişəninə yeni massiv mənimsədilir və bu səbəbdən sonuncu sətirdə arr massivinin 2-ci indeksinə yeni dəyər mənimsədilsə də bu original arr massivinə təsir etmir. Bütün bu yuxarıda qeyd etdiklərimizi yekunlaşdırıb qısaca belə deyə bilərik ki, əgər metoda göndərilən parametr Object olarsa, bu zaman obyektin referansının kopyası göndərilir və bu referans özündə obyektin heap yaddaşda mövcud olduğu ünvanı (the address of the memory location) saxlayır. Həmin ünvan üzərindən artıq eyni obyektə müraciət etmək mümkündür. Əgər metod daxilində referansa yeni dəyər mənimsədilərsə, artıq yaddaş ünvanı dəyişir və ondan sonrakı müraciətlər original obyektə təsir etmir.

Qeyd etdik ki, primitiv yaxud referans dəyişənə parametr olaraq göndərdiyimiz metodda dəyər mənimsədilirsə (assigning) bu orijinal dəyərə təsir göstərmir. Əgər metodda baş vermiş dəyişikliyin orijinal dəyərdə yansımasını istəyiriksə, o zaman metoddan qayıdan yeni dəyəri həmin orijinal dəyişənə mənimsətmək lazımdır. Əks halda dəyişilmiş dəyərdən imtina edilir.

public class ReturningValues {
  public static void main(String[] args) {
    int number = 1;                          // 1
    String letters = "abc";                  // abc
    number(number);                          // 1
    letters = letters(letters);              // abcd
    System.out.println(number + letters);    // 1abcd
  }
  public static int number(int number){
    number++;
    return number;
  }
  public static String letters(String letters){
    letters += "d";
    return letters;
  }
}

 

[topics lang=az]